მთავრობის ადმინისტრაციაში, საქართველოსა და ევროპის საინვესტიციო ბანკს (EIB) შორის გაფორმდა „საქართველოს ურბანული რეკონსტრუქციის და განვითარების პროექტის“ ფინანსური ხელშეკრულება, რომლის ფარგლებშიც, საქართველოსათვის გამოყოფილი იქნება 100 მილიონი ევროს ოდენობის ფინანსური რესურსი.
ხელშეკრულებას ხელი მოაწერეს ფინანსთა მინისტრმა, ნოდარ ხადურმა და ევროპის საინვესტიციო ბანკის ვიცე-პრეზიდენტმა, ლასლო ბარანიაიმ.
ხელმოწერის ცერემონიას დაესწრნენ პრემიერ-მინისტრი გიორგი კვირიკაშვილი, საქართველოში ევროკავშირის წარმომადგენლობის ხელმძღვანელი იანოშ ჰერმანი, რეგიონული განვითარებისა და ინფრასტრუქტურის მინისტრი ნოდარ ჯავახიშვილი.
„საქართველოს ურბანული რეკონსტრუქციის და განვითარების პროექტის“ ფინანსური ხელშეკრულებით გათვალისწინებული თანხები მიმართული იქნება საქართველოს სხვადასხვა რეგიონში მცირე ზომის ინფრასტრუქტურული პროექტების განხორციელებაზე, ტურისტული ინფრასტრუქტურის განვითარებაზე, თბილისის სტიქიის შედეგების ლიკვიდაციასა და დედაქალაქში განსახორციელებელი სხვა ინფრასტრუქტურული პროექტების დაფინანსებაზე.
თანხები მიიმართება ასევე მაღალმთიანი კურორტის განვითარებაზე, რაც ხელს შეუწყობს ადგილზე დასაქმებას, რეკრეაციული ზონის შექმნას, გაიზრდება მაღალმთიანი რეგიონების მიმზიდველობა, როგორც საერთაშორისო ტურისტებისათვის ისე ადგილობრივი დამსვენებლებისათვის.
პროექტი, სავარაუდოდ, 2019 წელს დასრულდება და მას მუნიციპალური განვითარების ფონდი და შპს მთის კურორტების განვითარების კომპანია განახორციელებენ.