საქართველოს მთავრობასა და კორეის რესპუბლიკის მთავრობას შორის „შემოსავლებზე ორმაგი დაბეგვრის თავიდან აცილებისა და გადასახადების გადაუხდელობის აღკვეთის შესახებ“ შეთანხმება ამოქმედდა.

მისი მთავარი მიზანია, ხელი შეუწყოს ქვეყნებს შორის ეკონომიკური თანამშრომლობის გაღრმავებასა და ინვესტიციების მოზიდვას, ასევე, გადასახადების გადაუხდელობისაგან თავის არიდებას, რაც საგადასახადო მიზნებისათვის ინფორმაციის გაცვლის საერთაშორისო სტანდარტების დანერგვით მიიღწევა.

დოკუმენტი ეფუძნება ეკონომიკური თანამშრომლობისა და განვითარების ორგანიზაციის (OECD) მოდელს და განსაზღვრავს ქვეყნებს შორის დაბეგვრის პრინციპებს.

კორეა საქართველოს ერთ-ერთი მნიშვნელოვანი ეკონომიკური პარტნიორია. საქსტატის მონაცემებით, იზრდება კორეის რესპუბლიკიდან განხორციელებული პირდაპირი უცხოური ინვესტიციები.

2015-2016 (2016 წლის პირველი ნახევარი) წლებში ინვესტიციების მოცულობამ 61.5 მლნ აშშ დოლარი შეადგინა. ორ ქვეყანას შორის სავაჭრო ბრუნვის მონაცემები ასეთია: 2013 წელს - 75.3 მლნ აშშ დოლარი, 2014 წელს - 59.2 მლნ აშშ დოლარი, 2015 წელს - 53.1 მლნ აშშ დოლარი, ხოლო 2016 წლის 10 თვის მონაცემებით 46.7 მლნ აშშ დოლარი.

ამჟამად, ორმაგი დაბეგვრის თავიდან აცილებისა და გადასახადების გადაუხდელობის აღკვეთის შესახებ შეთანხმება ძალაშია 53 ქვეყანასთან.