პირველი ვიცე-პრემიერი, ფინანსთა მინისტრი დიმიტრი ქუმსიშვილი საერთაშორისო სარეიტინგო სააგენტოს FitchRatings-ის წარმომადგენლებს შეხვდა.
შეხვედრა აშშ-ის ქალაქ ვაშინგტონში საერთაშორისო სავალუტო ფონდისა და მსოფლიო ბანკის წლიური შეხვედრების ფარგლებში გაიმართა, რომელსაც ასევე დაესწრნენ ეროვნული ბანკის პრეზიდენტი კობა გვენეტაძე, ფინანსთა მინისტრის მოადგილე ნიკოლოზ გაგუა და საქართველოს ელჩი აშშ-ში დავით ბაქრაძე.
შეხვედრაზე პირველმა ვიცე-პრემიერმა დიმიტრი ქუმსიშვილმა სარეიტინგო კომპანიების წარმომადგენლებს მიაწოდა დეტალური ინფორმაცია საქართველოს ეკონომიკური მაჩვენებლების შესახებ. მისი თქმით, ეკონომიკური ზრდა მნიშვნელოვნად აღემატება დაგეგმილ მაჩვენებლებს. 2017 წლის იანვარ-აგვისტოში ეკონომიკა 4.7 პროცენტით გაიზარდა. აღნიშნულ ზრდაში წარმმართველი როლი შეასრულა კერძო სექტორმა. ბიზნესმა წლის პირველ ნახევარში 30 ათასი ახალი სამუშაო ადგილი შექმნა. იმავე პერიოდში ბრუნვები კერძო სექტორში 18 პროცენტითაა გაზრდილი წინა წლის შესაბამის პერიოდთან შედარებით. შედეგად, დადებითი ტენდენციებია საბიუჯეტო შემოსავლების შესრულების თვალსაზრისით.
შეხვედრაზე ასევე გამახვილდა ყურადღება საერთაშორისო სავალუტო ფონდის მისიის წარმატებულად დასრულებაზე.
როგორც პირველმა ვიცე-პრემიერმა განაცხადა, დადებითი ტენდენციაა ეკონომიკის პრაქტიკულად ყველა მიმართულებით. ეროვნული ბანკის პრეზიდენტმა კობა გვენეტაძემ, თავის მხრივ, ყურადღება გაამახვილა ლარიზაციის 10-პუნქტიან გეგმასა და საბანკო-საფინანსო სექტორში არსებულ საკითხებზე.