საქართველოს ფინანსთა მინისტრი ივანე მაჭავარიანი სიტყვით გამოვიდა კონფერენციაზე: „საპენსიო რეფორმის სარგებელი საქართველოში - საფრანგეთის გამოცდილება“, რომელიც საფრანგეთის საელჩოსა და საფრანგეთის განვითარების სააგენტოს ორგანიზებით დღეს გაიმართა.

აღსანიშნავია, რომ საფრანგეთის განვითარების სააგენტო (AFD) და მისი პარტნიორი „ექსპერტიზ ფრანსი“ ქვეყანაში ოფიციალურად იწყებს საპენსიო რეფორმის ტექნიკური მხარდაჭერის პროექტს, რისთვისაც საფრანგეთის განვითარების სააგენტო 500 000 ევროს გამოყოფს.

საპენსიო სისტემაში დაგროვებითი, მეორე სვეტის შემოტანა მნიშვნელოვანი რეფორმაა საქართველოს მთავრობისა და ქართული საზოგადოებისათვის. რეფორმა უზრუნველყოფს ინდივიდუალურ პენსიას დასაქმებულთა და თვითდასაქმებულთათვის და ხელს შეუწყობს ქართული საფინანსო ბაზრის განვითარებას.

კონფერენციაზე სიტყვით გამოვიდნენ ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრი დავით სერგეენკო, ეკონომიკისა და მდგრადი განვითარების მინისტრის მოადგილე ეკატერინე მიქაბაძე, საფრანგეთის რესპუბლიკის ელჩი საქართველოში პასკალ მენიე, საფრანგეთის ჯანდაცვის ყოფილი მინისტრი მარისოლ ტურენი.