„გაუმჯობესებული ფინანსური ანგარიშგება მეოთხე კატეგორიის (მიკრო) საწარმოებისთვის ფინანსებზე მარტივი წვდომისთვის“, - ამ სახელწოდებით გაიმართა სამუშაო შეხვედრა სასტუმრო „იოტა თბილისში“, რომელსაც ბიზნეს ასოციაციების, სავაჭრო-სამრეწველო პალატებისა და პროფესიული გაერთიანებების წარმომადგენლები დაესწრნენ.

შეხვედრის მონაწილეები გაეცნენ ფინანსური ანგარიშგების ახალ, გამარტივებულ სტანდარტს, ამ სტანდარტის დანერგვისთვის შემუშავებულ თვითსწავლების დოკუმენტს, ასევე, მოისმინეს ინფორმაცია მცირე და საშუალო საწარმოთა ფასს სტანდარტების ცნობადობის ამაღლების პროექტის შესახებ.

IV, III და II კატეგორიის საწარმოთა მიერ სტანდარტების დანერგვა და მოწესრიგებული სააღრიცხვო სისტემა, ხელს შეუწყობს საწარმოთა ფინანსებზე ხელმისაწვდომობის ზრდასა და საფინანსო სექტორთან ურთიერთობის გამარტივებას, რაც თავის მხრივ, უზრუნველყოფს დასაქმების ხელშეწყობას, მეწარმეობის განვითარებასა და ინოვაციების დანერგვას.

აღნიშნული პროექტები ფინანსთა სამინისტროს ბუღალტრული აღრიცხვის, ანგარიშგებისა და აუდიტის ზედამხედველობის სამსახურისა და დონორი ორგანიზაციების - დიდი ბრიტანეთის „კარგი მმართველობის ფონდისა“ (UK Good Governance Fund) და ამერიკის შეერთებული შტატების საერთაშორისო განვითარების სააგენტოს პროექტის, „მმართველობა განვითარებისათვის“ მხარდაჭერით ხორციელდება.