საქართველოსა და მსოფლიო ბანკს შორის თანამშრომლობის საკითხები განიხილეს ფინანსთა მინისტრმა, ლაშა ხუციშვილმა და მსოფლიო ბანკის აღმასრულებელმა დირექტორმა, კოენ დევიდსემ ვირტუალურ ფორმატში გამართული შეხვედრისას.
როგორც აღინიშნა, მსოფლიო ბანკსა და საქართველოს შორის მრავალწლიანი ურთიერთობა, ძალიან პროდუქტიული თანამშრომლობის დემონსტრირებაა.
ფინანსთა მინისტრმა მსოფლიო ბანკის აღმასრულებელ დირექტორს, მადლობა გადაუხადა ბანკის მიერ საქართველოსთვის გაწეული მხარდაჭერისთვის კოვიდ-19-ის წინააღმდეგ ბრძოლის მიმართულებით. ამასთან, აღინიშნა, რომ მიმდინარეობს მუშაობა, ვაქცინის პროცესის ხელშეწყობისთვის დამატებითი ფინანსური რესურსების გამოყოფის თაობაზე.
ყურადღება გამახვილდა პოსტპანდემიურ პერიოდში ეკონომიკის განვითარების პერსპექტივაზე, განსაკუთრებით, ხაზი გაესვა ადამიანური კაპიტალის მნიშვნელობას, რომელიც არის სწრაფი ეკონომიკური ზრდისა და კონკურენტუნარიანობის ამაღლების ერთ-ერთი გასაღები.
შეხვედრაზე ფინანსთა მინისტრმა და მსოფლიო ბანკის აღმასრულებელმა დირექტორმა მიმოიხილეს ის მიმართულებები, რომელთა ხელშეწყობა მსოფლიო ბანკის მხრიდან გაგრძელდება პანდემიის დასრულების შემდეგ, ესენია: ტრანსპორტი და ლოგისტიკა, რეგიონების განვითარება, კერძო სექტორის ხელშეწყობა და კონკურენტუნარიანობის გაზრდა.
მხარეებმა გამოთქვეს იმედი, რომ ერთობლივი ძალისხმევით, ქვეყანა შეძლებს სწრაფად დაძლიოს არსებული გამოწვევები და გააგრძელოს დაწყებული რეფორმები.