მიმდინარე წლის 13 აგვისტოს, ფინანსთა მინისტრი ნოდარ ხადური დაესწრო 13-14 ივნისს მომხდარი სტიქიის სალიკვიდაციო და მდინარე ვერეს ხეობის მიმდებარე ტერიტორიის მდგომარეობის შესწავლისა და აღდგენითი სამუშაოების ორგანიზების მიზნით შექმნილი უწყებათაშორისი კომისიის სხდომას, რომელიც წყნეთი-ბეთანიის გზაზე გაიმართა. 

როგორც ფინანსთა მინისტრმა აღნიშნა, სამინისტრომ მყისიერად დაიწყო დამატებითი ფინანსური რესურსების მოძიება.

„თქვენ იცით, რომ ხაზინაში გაიხსნა სპეციალური ანგარიში, სადაც მოხდა თანხების მობილიზება. ამ წუთას აღნიშნულ ანგარიშზე არის 2,7 მილიონი ლარი. ეს ის თანხაა, რომელსაც უახლოეს დღეებში გადავრიცხავთ თბილისის ბიუჯეტში. გარდა ამისა, რამდენიმე დონორთან ვმუშაობთ იმასთან დაკავშირებით, რომ მოვიზიდოთ დამატებითი  დაფინანსება, რაც მოხმარდება თბილისში გზების რეაბილიტაციას, მათ შორის, კონკრეტულად ამ მონაკვეთს, რომელზეც საკმაოდ მძიმე მდგომარეობაა", - განაცხადა ფინანსთა მინისტრმა.