მიმდინარე წლის 20 ნოემბერს, ფინანსთა სამინისტროში საერთაშორისო სავალუტო ფონდის მისიასთან დასკვნითი შეხვედრა გაიმართა, რომელზეც ორი კვირის მანძილზე მიმდინარე მოლაპარაკებებზე მიღწეული პოზიტიური შედეგები და ორმხრივი თანამშრომლობის საკითხები განიხილეს.
როგორც ფინანსთა მინისტრმა, ნოდარ ხადურმა აღნიშნა, საერთაშორისო სავალუტო ფონდის მისიასთან შეთანხმება მიღწეულია მომავალი წლის მაკროეკონომიკურ პარამეტრებზე, მათ შორის, ქვეყანაში ეკონომიკური ზრდის, ინფლაციისა და ბიუჯეტის დეფიციტის მაჩვენებლებზე.
შეხვედრაზე იმსჯელეს საქართველოს მთავრობის პრიორიტეტებზე, იმ ღონისძიებებზე, რომელიც დაგეგმილია მაკროეკონომიკური სტაბილურობის, ეკონომიკური ზრდის ხელშეწყობის უზრუნველყოფის მიმართულებით, აგრეთვე ისაუბრეს ამ კუთხით საერთაშორისო სავალუტო ფონდის რეკომენდაციებზე.
როგორც ფინანსთა მინისტრმა აღნიშნა, მთავრობა მომავალ წელსაც გააგრძელებს სოციალური ვალდებულებების დაფინანსებას, აგრეთვე განათლების, ჯანდაცვისა და სოფლის მეურნეობის სექტორების, ინფრასტრუქტურული პროექტების მხარდაჭერას.
მსოფლიოსა და რეგიონში არსებული გამოწვევების ფონზე, ქართულმა მხარემ გამოთქვა სრული მზადყოფნა, გააგრძელოს ისეთი სტრუქტურული რეფორმები, რომლებიც ხელს შეუწყობენ ეკონომიკის განვითარებას.