მიმდინარე წლის 16 ივლისს, ფინანსთა მინისტრი ნოდარ ხადური ქალაქ რუსთავში დაესწრო #16 სასჯელაღსრულების დაწესებულების გახსნას. რეაბილიტირებული და ევროპულ სტანდარტების შესაბამისი დაწესებულება პრემიერ-მინისტრმა ირაკლი ღარიბაშვილმა დაათვალიერა და პენიტენციურ სისტემაში განხორციელებულ ცვლილებებზე ისაუბრა.
1048 მსჯავრდებულზე გათვლილ დაწესებულებაში რეკონსტრუქციის შედეგად, გარემონტდა საცხოვრებელი კორპუსები. საცხოვრებელის პარალელურად, აშენდა მულტიფუნქციური შენობა, რომლის პირველ სართულზეც განთავსდა სასადილო, ხოლო მეორე და მესამე სართულზე - ბიბლიოთეკა, საკლასო და კომპიუტერული კაბინეტები, აუდიტორიები, სოციალური პროგრამებისთვის საჭირო სივრცეები.
„ჩვენ წერტილი დავუსვით არაადამიანურ მოპყრობას ციხეებში და პრაქტიკულად რევოლუციური გარდაქმნა მოვახდინეთ სასჯელაღსრულების სისტემის,“–განაცხადა პრემიერ-მინისტრმა და აღნიშნა, რომ მსჯავრდებულთა რისკების მიხედვით კლასიფიკაცია თვისებრივად სრულიად ახალი, ქართული სასჯელაღსრულების სისტემისთვის რევოლუციური მნიშვნელობის მოვლენაა.