მიმდინარე წლის 17 ივლისს, ფინანსთა მინისტრი ნოდარ ხადური მთავრობის წევრებთან ერთად დაესწრო დედაქალაქში ოლიმპიური ცეცხლის შემოტანას, რომელიც პრემიერ-მინისტრმა ირაკლი ღარიბაშვილმა თავისუფლების მოედანზე საზეიმოდ აანთო.
„მინდა ყველას მოგილოცოთ ოლიმპიური ცეცხლის შემოსვლა ჩვენს დედაქალაქში. დღეს არის საოცარი დღე. ზუსტად ორი თვის წინ, ჩვენთვის, ყველასთვის საამაყო და სიმბოლურ დღეს – საქართველოს დამოუკიდებლობის დღეს ოლიმპიურ დედაქალაქ ათენში აინთო ცეცხლი, რომელიც ჩვენი დედაქალაქისთვის იყო განკუთვნილი. ამ ცეცხლმა შემოიარა მთელი საქართველო. ზუსტად 9 დღეში ჩვენი დედაქალაქი უმასპინძლებს ერთ-ერთ ყველაზე გამორჩეულ ფესტივალს. თბილისი არის მზად, რომ ღირსეულად ვუმასპინძლოთ ევროპის ახალგაზრდულ ოლიმპიურ ფესტივალს. მინდა ჩვენს საამაყო სპორტსმენებს ვუსურვო წარმატებები. მჯერა, რომ ჩვენ აუცილებლად ძალიან ბევრ ოქროს მედალს მოვიპოვებთ", - განაცხადა პრემიერ-მინისტრმა.
ოლიმპიური ცეცხლის თბილისში შემოსვლის საზეიმო ცერემონია თავისუფლების მოედანზე გამართული კონცერტით დასრულდა.