შიდა აუდიტის სფეროს გაძლიერების მიზნით, საქართველოს ფინანსთა  სამინისტრომ მიმდინარე წლის 18 სექტემბერს, სასტუმრო „თბილისი მარიოტში“ კოორდინაცია გაუწია კომპანია „Thomson Reuters”-სთან შეხვედრის ორგანიზებას და ისეთ საკითხზე მსჯელობას, როგორიცაა შიდა აუდიტის საქმიანობის ეფექტიანობის ამაღლება.

დღეს არსებული მდგომარეობით, შიდა აუდიტის სამსახურები ახორციელებენ რისკის შეფასებაზე დაფუძნებულ სტრატეგიულ და წლიურ დაგეგმვას, სისტემური და ეფექტიანობის აუდიტის განხორციელებას, რეკომენდაციების შესრულების მონიტორინგს, ამიტომ დღის წესრიგში დგება შიდა აუდიტის საქმიანობის პროცესის სისტემატიზაცია.

შიდა აუდიტის სფეროში პროგრამული უზრუნველყოფის დანერგვა, მნიშვნელოვანი           წინგადადგმული ნაბიჯი იქნება სამსახურის ეფექტიანობის გაზრდის მიმართულებით და ხელს შეუწყობს აღნიშნული ინსტიტუტის გაძლიერებასა და განვითარებას.

დღეს გამართულ საქმიან შეხვედრაზე კომპანია „Thomson Reuters“-ის წარმომადგენლებმა შიდა აუდიტორებს გააცნეს კომპანიის საქმიანობა და შიდა აუდიტორებისთვის შექმნილი პროგრამული უზრუნველყოფის - AutoAudit-ის უპირატესობები.

შიდა აუდიტის პროფესიონალებს ასევე შესაძლებლობა ჰქონდათ გაცნობოდნენ შიდა აუდიტორთა გლობალური ინსტიტუტის მიერ შეთავაზებულ მიდგომებს და სახელმწიფო შიდა კონტროლის დეპარტამენტის მიერ წარმოდგენილ პრეზენტაციას, რომელიც ეხებოდა საქართველოში სახელმწიფო შიდა ფინანსური კონტროლის სფეროში გატარებულ რეფორმებს და მიღწეულ შედეგებს.