საერთაშორისო სავალუტო ფონდისა და მსოფლიო ბანკის წლიური შეხვედრის ფარგლებში, პირველი ვიცე-პრემიერი, ეკონომიკისა და მდგრადი განვითარების მინისტრი ლევან დავითაშვილი, ფინანსთა მინისტრი ლაშა ხუციშვილი და ეროვნული ბანკის პრეზიდენტი ნათია თურნავა მსოფლიო ბანკის ოპერაციების მმართველ დირექტორს, ანა ბიერდეს შეხვდნენ.
მხარეებმა ხაზი გაუსვეს წარმატებული თანამშრომლობის ისტორიას, მიმოიხილეს მსოფლიო ბანკის მიერ საქართველოში მხარდაჭერილი პროექტები და მათი მნიშვნელობა ქვეყნის მდგრადი განვითარებისათვის.
საქართველოს მთავრობის წევრებმა და ეროვნული ბანკის ხელმძღვანელობამ მსოფლიო ბანკის ოპერაციების მმართველ დირექტორს გააცნეს ქვეყნის ეკონომიკური განვითარების ტენდენციები, ძირითადი მაკროეკონომიკური და ფისკალური პარამეტრები.
მხარეებმა დაადასტურეს მსოფლიო ბანკის მხარდაჭერის მნიშვნელობა, ქვეყნისთვის პრიორიტეტული საინვესტიციო პროექტებისა და რეფორმების განხორციელების პროცესში.
ქართული მხრიდან შეხვედრას დაესწრნენ ფინანსთა მინისტრის მოადგილეები გიორგი კაკაურიძე და ეკატერინე გუნცაძე, ეკონომიკისა და მდგრადი განვითარების მინისტრის მოადგილე ვახტანგ ცინცაძე.