თანამედროვე საბაჟო ინფრასტრუქტურა, საბაჟო სერვისების შეუფერხებელი მიწოდება, პროცედურების ეფექტიანად მართვა მნიშვნელოვან როლს ასრულებს ჩვენი მოქალაქეების, უცხოელი ვიზიტორებისათვისა და ბიზნესისათვის. სწორედ ამიტომ, ფინანსთა სამინისტრო განაგრძობს საბაჟო ინფრასტრუქტურის განვითარების პროცესს. ამ მიმართულებით, განსაკუთრებით მნიშვნელოვანია თანამშრომლობა მეზობელ თურქეთთან, რომელიც საქართველოს ერთ-ერთი მსხვილი სავაჭრო პარტნიორია.
დღეს, საქართველო-თურქეთის საზღვარზე, სარფის საბაჟო გამშვები-პუნქტის ტერიტორიაზე, ორ ქვეყანას შორის მგზავრთა გადასასვლელი დერეფანი ოფიციალურად გახსნეს და მოწვეულ სტუმრებს სიტყვით მიმართეს საქართველოს ფინანსთა მინისტრმა, ივანე მაჭავარიანმა, თურქეთის რესპუბლიკის ვაჭრობის მინისტრის მოადგილემ, გონჯა ილმაზ ბათურმა, აჭარის ავტონომიური რესპუბლიკის მთავრობის თავმჯდომარემ, თორნიკე რიჟვაძემ და ფინანსთა სამინისტროს შემოსავლების სამსახურის უფროსმა, ვახტანგ ლაშქარაძემ.
ღონისძიების ფარგლებში, ჩატარდა საქართველოსა და თურქეთის დელეგაციების ორმხრივი შეხვედრა. მაღალი პროფესიონალიზმისა და განსაკუთრებული სირთულის დავალების კეთილსინდისიერად შესრულებისთვის დაჯილდოვდნენ მებაჟე-ოფიცრები.
მგზავრთა მიმოსვლის გაუმჯობესების მიზნით, სარეკონსტრუქციო სამუშაოები სარფის საბაჟო გამშვებ-პუნქტზე მიმდინარე წლის მარტში დაიწყო. განხორციელდა მოსაცდელი დარბაზის, შემოსვლისა და გასვლის გვირაბების სამშენებლო, სარემონტო სამუშაოები, კეთილმოეწყო და გამწვანდა საბაჟო გამშვები-პუნქტის მიმდებარე ტერიტორია.
განახლებული ინფრასტრუქტურა ხელს შეუწყობს ორ ქვეყანას შორის მოქალაქეთა კომფორტულ გადაადგილებას, პროცედურების გამარტივებას, საქართველოსა და თურქეთის საბაჟო სამსახურების ჰარმონიზებას.