დღეს, ფინანსთა მინისტრის მოადგილეები ლაშა ხუციშვილი და გიორგი კაკაურიძე მოგების გადასახადით დაბეგვრის რეფორმის რეტროსპექტიული რეგულირების ზეგავლენის (EX-posts RIA) შეფასების პრეზენტაციას დაესწრნენ.
ღონისძიება საქართველოს პარლამენტის თავმჯდომარემ არჩილ თალაკვაძემ, ფინანსთა მინისტრის მოადგილემ, ლაშა ხუციშვილმა, პარლამენტის საფინანსო-საბიუჯეტო კომიტეტის თავმჯდომარემ, ირაკლი კოვზანაძემ და GIZ-ის სამართლის პროგრამის ჯგუფის ხელმძღვანელმა, ლაშა პაპუაშვილმა გახსნეს.
როგორც პრეზენტაციაზე აღინიშნა, დაინტერესებულ მხარეებთან გამართული კონსულტაციების შედეგად, გამოიკვეთა, რომ მოგების გადასახადის რეფორმა მნიშვნელოვანი შეფერხებების გარეშე განხორციელდა და ის ერთ-ერთი ყველაზე გამჭვირვალეა ბოლო დროის ინიციატივებს შორის, ასევე, რეფორმის მიზნები პასუხობს კერძო სექტორის წინაშე არსებულ გამოწვევებსა და მნიშვნელოვნად აუმჯობესებს საქართველოს საინვესტიციო გარემოს. რეგულირების ზეგავლენის შეფასების ფარგლებში, შესწავლილი სტატისტიკური მონაცემების ანალიზის შედეგად, დადებითი ტენდეციებია კერძო კომპანიების ფინანსურ მაჩვენებლებში და მნიშვნელოვნად დახვეწილია ადმინისტრირება.
„მოგების გადასახადის რეფორმა არის ერთ-ერთი ყველაზე მასშტაბური რეფორმა საგადასახადო მიმართულებით, რომელიც ქვეყანაში განხორციელებულა. მნიშვნელოვანია, რომ რეფორმის გატარების შემდგომ კომპანიებში გაიზარდა რეინვესტირების მაჩვენებელი, გაუმჯობესდა საგადასახადო და ბიზნესგარემო. ბიზნესს გაუჩნდა, დაახლოებით, ერთი მილიარდი ლარის რეინვესტირების რესურსი და დაჩქარდა ეკონომიკური ზრდა ქვეყანაში. ამასთან, მნიშვნელოვანია, რომ არსებითად გამარტივდა მოგების გადასახადის საგადასახადო ადმინისტრირება როგორც გადასახადის გადამხდელებისათვის, ისე საგადასახადო ორგანოებისთვის. ამის ნათელი მაგალითია უშუალოდ მოგების გადასახადთან დაკავშირებული საგადასახადო დავების რაოდენობა, რომელიც ბოლო 2 წლის განმავლობაში 95%-ით არის შემცირებული“, - აღნიშნა ლაშა ხუციშვილმა.
პრეზენტაციას, რომელიც პარლამენტის საფინანსო-საბიუჯეტო კომიტეტის ინიციატივით, ISET-ის Pwc-ის მონაწილეობითა და GIZ-ის ფინანსური მხარდაჭერით გაიმართა, ბიზნესომბუდსმენი, აღმასრულებელი ხელისუფლების, საერთაშორისო ორგანიზაციების, ბიზნესსექტორის წარმომადგენლები და ეკონომისტები დაესწრნენ.