ფინანსთა მინისტრი ივანე მაჭავარიანი ნიდერლანდების სამეფოს საგანგებო და სრულუფლებიან ელჩს საქართველოში, მააიკე ვან კოლდამს შეხვდა.
გაცნობითი ხასიათის შეხვედრაზე მხარეებმა ისაუბრეს ორ ქვეყანას შორის სავაჭრო-ეკონომიკურ სფეროში ორმხრივი პარტნიორობის საკითხებზე. ასევე, ხაზი გაუსვეს თანამშრომლობის მნიშვნელობას ისეთ სფეროებში, როგორიცაა: საჯარო ფინანსების მართვა, საფინანსო სექტორი, გარემოს დაცვა, სოფლის მეურნეობა და ინფრასტრუქტურა.
ივანე მაჭავარიანმა დიპლომატს მადლობა გადაუხადა იმ აქტიური მხარდაჭერისთვის, რომელსაც ნიდერლანდების სამეფო უწევს საქართველოს, განსაკუთრებით საერთაშორისო სავალუტო ფონდსა და მსოფლიო ბანკში, სადაც საქართველოს წარმოადგენენ ჰოლანდიელი აღმასრულებელი დირექტორები.
ყურადღება გამახვილდა საქართველოსა და ნიდერლანდების სამეფოს ფინანსთა სამინისტროებს შორის ურთიერთთანამშრომლობის მემორანდუმის მნიშვნელობაზე.
დოკუმენტი, რომელსაც ხელი მოაწერეს საქართველოსა და ნიდერლანდების სამეფოს ფინანსთა მინისტრებმა, ითვალისწინებს მხარეებს შორის მომდევნო 2 წლის განმავლობაში ცოდნის, გამოცდილებისა და ინფორმაციის გაცვლა/გაზიარებას.
როგორც ნიდერლანდების სამეფოს საგანგებო და სრულუფლებიანმა ელჩმა აღნიშნა, ნიდერლანდების მთავრობა მომავალშიც აქტიურად გააგრძელებს საქართველოს მთავრობის მხარდაჭერას ქვეყნისთვის პრიორიტეტული სფეროების დასაფინანსებლად.
ფინანსთა მინისტრმა სტუმარს წარმატებული საქმიანობა უსურვა და იმედი გამოთქვა,რომ ორ ქვეყანას შორის პარტნიორობა კვლავ გაგრძელდება და კიდევ უფრო გაღრმავდება.