დღეს, საქართველოს ფინანსთა სამინისტრომ და საფრანგეთის განვითარების სააგენტომ გააფორმეს ხელშეკრულება ხაშურის წყალმომარაგებისა და წყალარინების სისტემების აღდგენის სამუშაოების დასაფინანსებლად 58 მილიონი ევროს ოდენობის ფინანსური რესურსის გამოყოფის თაობაზე.
აღნიშნული სამუშაოების შესასრულებლად ევროკავშირმა დამატებით გამოყო 7,15 მილიონი ევროს ოდენობის გრანტი. დოკუმენტს ხელი მოაწერეს საქართველოს ფინანსთა მინისტრმა, ივანე მაჭავარიანმა, საფრანგეთის ელჩმა საქართველოში, დიეგო კოლასმა და საფრანგეთის განვითარების სააგენტოს სამხრეთ კავკასიის რეგიონული სააგენტოს დირექტორმა, გაელ ასაიაგმა.
ხელმოწერის ცერემონიას დაესწრო საქართველოში ევროკავშირის დელეგაციის ჯგუფის ხელმძღვანელი დომენიკ პაპენჰეიმი.
პროექტს, რომლის მიზანია, ქალაქ ხაშურში წყალმომარაგებისა და წყალარინების თანამედროვე სისტემების შექმნა, საქართველოს გაერთიანებული წყალმომარაგების კომპანია განახორციელებს.