ქვეყანაში ბიზნესგარემოს კიდევ უფრო მეტად გასაუმჯობესებლად, საქართველოს როგორც რეგიონული ჰაბის პოტენციალის გაძლიერებისა და მულტინაციონალური საერთაშორისო კომპანიების დაინტერესების გაზრდის მიზნით, საქართველოს მთავრობა კომპანიებს საშუალებას აძლევს მიიღონ „საერთაშორისო კომპანიის“ სტატუსი და ისარგებლონ საგადასახადო შეღავათებით.

აღნიშნული სტატუსის მქონე საწარმოებისთვის მოგებისა და საშემოსავლო გადასახადები 15%-ისა და 20%-ის ნაცვლად იქნება 5%.

მთავრობის გადაწყვეტილებით, დადგინა საერთაშორისო კომპანიის სტატუსის განსაზღვრისა და მისთვის ნებადართული საქმიანობის სახეები, ასევე ცალკეული ხარჯების ნუსხა.

აღნიშნული შეღავათები ეხება IT დ საზღვაო სერვისებს.

როგორც პრემიერ-მინისტრმა გიორგი გახარიამ აღნიშნა, პოსტპანდემიური ეკონომიკური აღდგენის პერიოდში მძაფრი გლობალური ეკონომიკური კონკურენციის გათვალისწინებით, საქართველოს მთავრობა კომპანიებს აძლევს საშუალებას, მიიღონ „საერთაშორისო კომპანიის” სტატუსი და ასევე საერთაშორისო კომპანიებს უქმნის კომფორტულ პლატფორმას იმისათვის, რომ საქართველოდან იმუშაონ.

„შეღავათი ეხებათ საზღვაო ბიზნესთან დაკავშირებულ კომპანიებს და ასევე IT კომპანიებს. ორივე მიმართულება მნიშვნელოვანია როგორც გლობალური ეკონომიკის განვითარებისთვის, ასევე საქართველოსთვის, რამეთუ ტრანსპორტი და ლოგისტიკა ჩვენი ეკონომიკის ერთ-ერთი მნიშვნელოვანი სექტორია, ისევე, როგორც IT მიმართულებაში გვაქვს სერიოზული რესურსი, რომელიც ასამოქმედებელია“, - განაცხადა გიორგი გახარიამ.

როგორც ფინანსთა მინისტრმა ივანე მაჭავარიანმა აღნიშნა, საერთაშორისო კომპანიის სტატუსის მისაღებად, კომპანია უნდა აკმაყოფილებდეს გარკვეულ პირობებს.

„კომპანიას უნდა ქონდეს ნებადართული საქმიანობის არანაკლებ 2 წლის გამოცდილება, ასევე, შეიძლება იყოს არარეზიდენტი საწარმოს წარმომადგენელი საქართველოში, თუ ამ არარეზიდენტ საწარმოს აქვს ნებადართული საქმიანობის არანაკლებ 2 წლის გამოცდილება, ასევე, შეიძლება ჰყავდეს 50%-ზე მეტი წილის მქონე პარტნიორი, რომელსაც ექნება ნებადართული საქმიანობის არანაკლებ 2 წლის გამოცდილება. საწარმოს, რომელსაც სურს საერთაშორისო კომპანიის სტატუსის მინიჭება, სტატუსის ფარგლებში ნებადართულ საქმიანობას ფიზიკურად უნდა ახორციელებდეს საქართველოდან. მას უნდა გააჩნდეს სათანადო ადამიანური რესურსები საჭირო კვალიფიკაციით და უზრუნველყოს შესაბამისი საოპერაციო ხარჯების გაწევა“, - აღნიშნა ფინანსთა მინისტრმა ივანე მაჭავარიანმა.

მთავრობის დადგენილების გასაცნობად გადადით ბმულზე:

https://matsne.gov.ge/ka/document/view/5012362?publication=0